Discurs dul Re Busin

Oman e donn e fiö dul centro e di paes

dul lagh ala muntagna, gent tüta da Vares,

Busitt! … mi va salüdi! L’è mia ‘na busia

sa disi ca ma piaas da vess in cumpagnia

e fà ‘n pù da baldoria cun tütt i Varesitt,

sia giuvin e sia vecc, sia grand che piscinitt.

E mò, par mia perd temp,

cuminci a parlà di böcc … in giir ga n’è un vagun,

picul e grand, prufund, da tütt i dimensiun:

gh’è böcc süi marciapè, in di piazz, in sü la strava,

ga n’è fina ‘n quaivün sott ala purtegava,

che vün ca ‘l nass in giir senza ten vert i öcc

ul men ca pó sücedigh l’è da perà i ginöcc!

E quell ca ga partoca da fagh i giüstament

ca ‘l sculta sa ga disi, e ‘l tegna ben a ment:

che in certi caas l’è méi, par mia ris’cià di guai,

‘na pezza malmetüa che mia un böcc ben fai!

Pö gh’è in ball la caserma: un facc straurdinari

cumprala a bun marcaa … al pararia ‘n’afari

par fa ‘l teatar nööv, speremm da mia speciall

par ‘na trentena d’ann … prima d’inaügürall;

però par fa ‘l teatar büsögna trala gió

un quaj vün al diis da sì, ‘n quaj alt al diis da nò

e in sü l’argument tücc vöran ‘vegh resun

gh’è fina vegnüü in giir un gran prufessurun,

e ultra che trà in pee dumà ‘n grand rebelott

sütan balagh in giir senza decid nagott.

Intant l’è lì … vardela, tüta sarava sü

l’è già ‘n bell pù da temp ca la duperan pü,

gh’è dent i müür tütt crepp, pa’ intant l’è ancamò in pee,

.. sa specian anmò ‘n pù … la squara daparlee!

Vöj div d’un àltar facc: quand calan i palanch

sa pò fà pü nagott, e alura stee ben franch,

parchè quij ca cumanda duperan mia dul sò,

e se ‘l burzin l’è voj va ‘n cercan ancamò,

Guvernu, Regiun, Cumün van già tira al punt giüst,

cun la scarzèla voia e ‘l giché cui manich früst,

cun l’irpef, ici, imu, tares e tütt quij altar ball,

da pudé pü fà ‘n pett senza duvé pagall!

Chinscì a vuré ‘na innanz … finissaria pü,

però sun già stai lungh … l’è mei taiala sü.

Pürtropp anca quest’ann i robb hinn mia tant bej,

e vialt sii sempar ‘dré a murisnà i murej;

però mi gh’ho fidücia parchè cugnossi ben

la scepa di Busitt, e só da dua la ven:

Busitt hinn la mej part da gent ch’hinn fort e san,

sincer, senza tant verz, leal, cul cöör in man,

lavuradur in gamba quand’hinn in sül laurà

e bun da stà anca alegar insema ai sò da cà,

viscur sa gh’hann furtüna, ma fort e mia piangin

anca se ‘na quai scoppola la bürla in sül cupin.

E alura: fö la paia, e fee vidé chi sii!

Beh, mò la taj sü, va lassi in cumpagnia

di vost da cà, di amiis, e par finì in legria

stassira, dopu scena, un bell grapin

par fa cin-cin, insema al vostar

Re Busin

© riproduzione riservata